Қазақстан Ұлттық экономика вице-министрі Павлодардық бизнес өкілдерімен не туралы сөйлесті

2025 жылғы 16 Қазан

- Павлодар облысы

266 просмотров

Қазақстан Республикасының Ұлттық экономика вице-министрі Ерлан Сагнаев, Ауыл шаруашылығы министрлігінің аграрлық ғылым және білім департаментінің директоры Айхан Сұлтан және Ұлттық экономика министрлігінің табиғи монополияларды реттеу комитеті төрағасының орынбасары Қанат Күлназаров Павлодар облысының кәсіпкерлерімен кездесіп, мемлекет жүргізіп отырған экономикалық саясатты, соның ішінде жаңа Салық кодексінің нормаларын түсіндірді. Кездесуді ұйымдастыруға Павлодар облысының кәсіпкерлер палатасы қолдау көрсетті.

Іс-шараның модераторы болып облыс әкімінің орынбасары Даурен Жамбайбек қызмет атқарды. Кездесуге өңірлік «Атамекен» палатасының директоры Ерқанат Әбенов, облыстық мәслихат төрағасы Илья Теренченко, аумақтық және жергілікті атқарушы органдардың басшылары қатысты.

Елдің Ұлттық экономика вице-министрі өңір бизнесіне жаңа Салық кодексінің негізгі ережелерін таныстырды. Құжатқа Республика Президенті 18 шілдеде қол қойған болатын. Кездесу барысында әлеуметтік маңызы бар азық-түлік тауарларының бағасын қалыптастыру және тарифтік саясат мәселелері де талқыланды.

Ерлан Сагнаев атап өткендей, жаңартылған Салық кодексі салықтық әкімшілендіруді едәуір жеңілдетуді көздейді: салық есептілігінің көлемі 30 пайызға, салық түрлерінің саны 20 пайызға қысқарады. Сондай-ақ алымдар мен жеңілдіктер оңтайландырылатын болады.

«Салықтар азаяды: бірыңғай жер салығы жойылады, кейбір төлемдер бойынша мөлшерлемелер мен алымдар саны қысқарады. Маңызды өзгерістер барлық негізгі бағыттарға әсер етті: корпоративтік және жеке табыс салықтарынан бастап инвестицияларды ынталандыру мен салықтық жүктемені қайта бөлуге дейін», – деді спикер.

Арнайы салық режимдерін оңтайландыру жайында айта келе, ол олардың үшеуі болатынын атап өтті: фермер қожалықтарына арналған, өзін-өзі жұмыспен қамтыған азаматтарға арналған және оңайлатылған декларация негізіндегі режимдер. Соңғылары, яғни өзін-өзі жұмыспен қамтығандар, төлемдерді мобильді қосымшалар арқылы жүзеге асыра алады. Бұл режимді жеке тұлғалар, қазақстандықтар және тарихи отанына оралған отандастар ай сайынғы табысы 300 айлық есептік көрсеткіштен аспаған жағдайда қолдана алады.

Кездесуге қатысушылардың әрқайсысы өз сұрағына толыққанды жауап алды. Ведомство өкілдері кейбір павлодарлық кәсіпкерлердің байланыс деректерін алып, туындаған мәселелерін шешуге жәрдемдесу мақсатында қосымша зерделеу жүргізетін болды.