Астаналық кәсіпкерлер палатасы «Халық заңгері» республикалық акциясы шеңберінде кәсіпкерлерге құқықтық қолдау көрсетті
Қазақстанның ірі қалаларында халықтың құқықтық сауаттылығын арттыруға және тегін заң көмегін көрсетуге бағытталған кең ауқымды республикалық «Халық заңгері» акциясы өтті.
Астанадағы іс-шара Оқушылар сарайында ұйымдастырылып, елорда тұрғындары мен қонақтары жетекші адвокаттардан, нотариустардан, прокурорлардан, тергеушілерден, сот орындаушылардан, мемлекеттік органдардың басшыларынан және заң қауымдастығының өкілдерінен кеңес алды. Акцияның басты мақсаты – халықтың құқықтық сауаттылығын арттыру және әрбір азаматқа кәсіби заң көмегін тегін алу мүмкіндігін қамтамасыз ету.
Іс-шараның ұйымдастырушылары – Қазақстан Республикасының Бас прокуратурасы, Әділет министрлігі, мемлекеттік билік органдары, Республикалық адвокаттар алқасы, сондай-ақ еліміздің жетекші заңгерлері мен қорғаушылары.
Акцияға Астана қаласы кәсіпкерлер палатасы «Атамекен» де белсене қатысты. Кәсіпкерлердің құқықтарын қорғау және әкімшілік кедергілерді төмендету бөлімі басшысы Олжас Аязбаев пен сарапшы Гүлжайна Пернебай бизнес-қоғамдастық өкілдерінің сұрақтарына жауап беріп, келіп түскен өтініштер бойынша бірлесіп жұмыс істеу үшін байланыс орнатты.
Қабылдау барысында демалыс аймағының иесі болып табылатын кәсіпкер мемлекеттік бақылаушы органдар тарапынан жүйелі қысымға ұшырап жүргенін айтты. Оның айтуынша, бизнес нысаны жиі тексерулерге ұшырап, кей жағдайларда құқықтық негізі жеткіліксіз нұсқамалар алады.
«Мұндай әрекеттер бизнестің қалыпты қызметіне кедергі келтіреді, әкімшілік тосқауылдар туғызады және мемлекеттік институттарға деген сенімді төмендетеді. Палата бұл жағдайға құзыретті органдардың назарын аударып, оны ерекше бақылауда ұстау қажет деп санайды, себебі құқықтық мемлекет жағдайында мұндай фактілерге жол берілмеуі тиіс», – деді Олжас Аязбаев.
.jpeg)
Кәсіпкерге ресми өтінішті e-Otinish платформасы арқылы жолдау ұсынылды. Осыдан кейін Палата мәселені әрі қарай қарауға дайын екенін білдірді.
Сонымен қатар, қатысушылардың көбі бизнесті қолдаудың қаржылық емес шараларына қызығушылық танытты. Палата өкілдері кәсіпкерлікті дамытуға бағытталған қолданыстағы бағдарламалар, оқу курстары мен сервистік қызметтер туралы кеңінен ақпарат берді.
Акция форматы қала тұрғындары үшін өте ыңғайлы болды: бір орында бірнеше маманнан бір мезетте кеңес алу мүмкіндігі туды. Бұл тәсіл азаматтарға уақыт үнемдеуге және түрлі инстанцияларға жүгіну қажеттілігінен арылуға мүмкіндік берді.
Іс-шара барысында келушілерге пайдалы құқықтық ақпарат қамтылған жадынамалар мен буклеттер таратылды. LED-экрандарда алаяқтықтың, дропперліктің және басқа да құқық бұзушылықтардың алдын алу туралы бейнероликтер көрсетіліп, акцияның ағартушылық әсерін арттырды. Сол күні шамамен 800 елорда тұрғыны мен қонағы заңгерлік кеңес алды. Бірқатар мәселелер сол жерде шешімін тапса, қалғандарына нақты ұсыныстар мен уәкілетті органдарға жүгіну жөнінде түсініктеме берілді.
«Халық заңгері» акциясы 2016 жылдан бері өткізіліп келеді және азаматтардың құқықтық институттарға деген сенімін нығайтқан жақсы дәстүрге айналды. Осы уақыт ішінде 400 мыңнан астам қазақстандық тегін заң көмегін алып, жобада 10 мыңнан астам маман қатысты.
Акцияның ауқымы мен форматы тек Қазақстанда ғана емес, бүкіл әлем бойынша бірегей жоба саналады. Бұл бастама әрбір азаматқа - кәсіпкерге, студентке немесе зейнеткерге білікті кеңес алып, өз құқықтарын қорғауға мүмкіндік береді. Жыл сайын жобаға деген қызығушылық артып келеді, ал оның миссиясы бір реттік консультациялардан асып түсіп, құқықтық мәдениетті қалыптастыру алаңына айналуда. «Халық заңгері» - әрбір қазақстандық өз құқықтарын сенімді білетін және қажет болған жағдайда қайда жүгіну керектігін нақты түсінетін платформаға айналды.
Пікір қалдыру:
Пікірлер: